చైతన్య జ్యోతులారా!

 - సుల్తానా

చైతన్య జ్యోతులారా - నవ జీవన స్రవంతులారా!
శీలవతులారా - కోమల మనస్కులారా
సత్యవతులారా - త్యాగమయిలారా
అబలలు కాదు సబలలు మీరమ్మా!!
మీ పాదాల చెంత స్వర్గముందమ్మా!!!

సహనానికి మీరే మాతృకలు - శాంతానికి మీరే ఏలికలు
స్నేహానికి మీరే వల్లికలు - మమతలకు మీరే మల్లికలు
ఆప్యాయతను పెంచే అమ్మలు మీరమ్మా...
తత్వవేత్తల ఉనికికి తల్లులు మీరమ్మా....
ప్రవక్తలు పెరిగింది మీ ఒడిలోనేయమ్మా...

సౌమ్యానికి మీరే సుమలతలు - సాత్వికత పంచే సహన శీలులు
వినయానికి మీరే పొందికలు - విధేయతకు మీరే తారకలు
సత్యాత్ముల్ని సాకిన సాహస వనితలు మీరమ్మా!
దురాత్ముల్ని చెండాడిన వీర మాతలు మీరమ్మా!!

ఇంటికి మీరే దీపాలు - ప్రేమకు మీరే ప్రతిరూపాలు
సమరానికి మీరే  ప్రేరకులు - విజయానికి మీరే కారకులు
ఆసియా సయ్యిదా సోదరిలోయమ్మా...
మర్యం సయ్యిదా వారసులోయమ్మా...
ఖదీజా తాహిరా కూతురులోయమ్మా...
ఆయిషా సిద్దీఖాకు శిష్యులోయమ్మా...
ఫాతిమా సయ్యిదాకు ప్రియ సఖులోయమ్మా...
ఖుర్‌ఆన్‌ చదువుతూ కదలాలోయమ్మా...
ధర్మ తేజమై వెలగాలోయమ్మా!